Home அரசியல் ஓய்வுவயது நீட்டிப்பின் பின்னால் ரூ.5 ஆயிரம் கோடி – கி.வீரமணி புட்டுப்புட்டு வைக்கிறார்

ஓய்வுவயது நீட்டிப்பின் பின்னால் ரூ.5 ஆயிரம் கோடி – கி.வீரமணி புட்டுப்புட்டு வைக்கிறார்

956
0

படித்த இளைஞர்கள் பல்லாயிரக்கணக்கில் வேலைக்காகக் காத்திருக்கும் கட்டத்தில், அரசுப் பணியாளர்களின் ஓய்வு வயதை 58-லிருந்து 59 ஆக உயர்த்தியிருப்பது கண்டிக்கத்தக்கது. 5 ஆயிரம் கோடி ரூபாய் செலவை சரிக்கட்டுவதற்காக மேற்கொள்ளப்பட்டுள்ள இம்முடிவை அரசு கைவிடவேண்டும் என்று திராவிடர் கழகத் தலைவர் கி.வீரமணி கூறியுள்ளார்.

இது குறித்து அவர் வெளியிட்டுள்ள அறிக்கை விவரம்:

”தமிழ்நாடு அரசின் ஓய்வு பெறும் அரசு ஊழியரின் வயதை 58லிருந்து, 59 ஆக ஓராண்டு கூடுதலாக நீட்டித்து அரசு ஆணை பிறப்பித்து, அதற்கேற்ப அரசின் அடிப்படை விதிமுறைகளையும் விரைவில் திருத்திட முனைய இருப்பதாகவும் செய்தி கள் வந்திருப்பது, மிகவும் அதிர்ச்சிக்கும், வேதனைக்கும் உரியது. திராவிடர் கழகம் இந்த முடிவினை வன்மையாகக் கண்டிக் கிறது.

அரசுப்பணி கிடைக்கும் என்று எதிர்பார்த்து, அந்த வாய்ப்பு கிடைக்காது வேதனையில் வெந்து கொண்டிருக்கும் 25 ஆயிரத்திற்கும் மேற்பட்ட இளைஞர்கள் எண்ணத்தில், வாய்ப்பில் மண்ணைப் போட்ட மாபெரும் தவறான முடிவு ஆகும் இது! பல ஆண்டுகளாக வேலை வாய்ப்பு நிலையங்களில் பதிவு செய்து காத்திருந்தவர்கள், இப்போது இதன்மூலம் ‘இலவு காத்த கிளிகளாக’ ஆன பரிதாபம்!

அந்த 25,000 வேலைவாய்ப்புகளும், 69 சதவிகித இடஒதுக்கீட்டின்படி புதிதாய் நியமனம் செய்யப்பட்டிருந்தால், அதன்மூலம் புதிய வாய்ப்புகளைப் பெற ஆவலாக இருந்த தாழ்த்தப்பட்ட, பழங்குடி, பிற்படுத்தப்பட்ட, மிகவும் பிற்படுத்தப்பட்டவர்களின் விருப்பமும் சிதைக்கப்பட்டதாகிவிட்டது.

ஜாக்டோ – ஜியோ அமைப்பு இதைக் கண்டனம் செய்துள்ளது மிகவும் வரவேற்கத்தக்கதாகும். மற்ற அரசு ஊழியர்கள் சங்கம் சில விசுவாச சங்கங்கள் இதனை – 59ஆக ஓய்வு வயதை உயர்த்தியதை வரவேற்றுள்ளன. இதை, தமிழக அரசு இப்போது முடிவு செய்தது, இந்த அரசு ஊழியர்கள் நலன் கருதி அல்ல. மாறாக, ரூ.5,000 கோடி நிதியை மிச்சப்படுத்த இது ஒரு குறுக்குவழி – உத்தி என்பதால்தான், என்பதை அவர்களும் புரிந்துகொள்ள வேண்டும்.

ஓய்வூதியத் தொகைமூலம் அவர்களுக்குக் கிடைக்கவேண்டிய கிராஜுயூட்டி தொகை பாக்கி ரூ.2,763.63 கோடியும், மற்றபடி புதிய பென்ஷன் தொகை சுமார் 2,220 கோடி ரூபாயும் இப்போது தரப்பட வேண்டிய நிலையை தள்ளிப் போட்டு, இப்படி ஒரு ‘‘சமத்கார யோசனையை’’ சில நிதித்துறை அதிகாரிகள் கூறியதன் விளைவு இந்தத் தவறான முடிவு.

இந்தத் தொகை சுமார் 5,000 கோடி ரூபாய்க்கு வேறு மார்க்கத்தை – அரசு ஊழியர்களுக்குக்கூட குறிப்பிட்ட ஒரு தொகை அளித்துவிட்டு, எஞ்சியதை பாண்டு மூலமோ அல்லது மாற்று ஏற்பாடு மூலம் அரசு ஊழியர்கள் அமைப்புகளை (ஜாக்டோ ஜியோ உள்பட) முக்கிய பல தொழிற்சங்கத் தலைவர்களை அழைத்துப் பேசி நல்ல கருத்திணக்கத்தை ஏற்படுத்தி, யாருக்கும் பாதிப்பில்லாத நிலைமையை உருவாக்க்முடியும். புதிய இளைஞர்கள் வாழ்வில் இப்படி விரக்தியடையும் நிலை ஏற்படாது. இந்தப் பணிகள் பலவற்றை தனியார்மூலம் ஒப்பந்தங்களை விட்டு, தனியார்மயம் ஆக்கப்படக் கூடிய, பாரதூர விளைவுகளும் எதிர்பார்க்கப்பட வேண்டியதாகும்.

பா.ஜ.க.வின் மத்திய அரசு, சமூகநீதிக்கு எதிராக மாணவர் சேர்க்கையிலும், வேலைவாய்ப்பிலும் குழிபறிக்கும் நிலை ஒருபுறம் என்றால், மாநில அரசும் 69 சதவிகித இடஒதுக்கீட்டினையும் காற்றில் பறக்கவிட கனகச்சித ஏற்பாடுபோல, இரவில் வீட்டில் கன்னக்கோல் வைத்துப் பொருளை எடுத்துச் செல்வதுபோல, 25,000 அரசு வேலைவாய்ப்புகளை இப்படி ஓர் ஆணையின்மூலம் எவ்வித முன்யோசனையுமின்றி தீராப் பழியை சுமக்கலாமா? இதனை மறுபரிசீலனை செய்யவேண்டும்.

மண்டல் குழுப் பரிந்துரைகளின்படி பிற்படுத்தப்பட்டோருக்கு 27 விழுக்காடு இடங்கள் மத்திய அரசுப் பணியில் கிடைக்கவிருந்த சந்தர்ப்பத்தில் வாஜ்பேயி தலைமையிலான மத்திய அரசு, மத்திய அரசுப் பணியாளர்களின் ஓய்வு வயதை திடீரென்று 60 வயதாக உயர்த்தியது. அதற்கு கடும் எதிர்ப்பு தெரிவிக்கப்பட்டது.” என்று பழைய சம்பவத்தையும் வீரமணி குறிப்பிட்டுள்ளார்.

Advertisement